Mercinews


Abu Mudi: Lon Keubah Toko, Keunoe Lon Jak Meukat Bak Gaki Limong

FB IMG 1533562275938 - Abu Mudi: Lon Keubah Toko, Keunoe Lon Jak Meukat Bak Gaki Limong
Pengajian Abu Mudi di Mesjid Raya Baiturrahman Banda Aceh.

Banda Aceh, Mercinews.com — Banda Aceh, Abu Mudi sidroe ulama rayek di Aceh dari Dayah MUDI Mesra Samalanga, tiep malam Sabtu nibak awai buleun sabee neu seumeubeut di Mesjid Raya Baiturrahman Banda Aceh.

FB IMG 1533562085254 - Abu Mudi: Lon Keubah Toko, Keunoe Lon Jak Meukat Bak Gaki Limong

Biasa jih lam neubeut, Abu neu seumeubeut kita Siyarussalikin. Meuseubab lam kitab nyan, ka komplit disinan kajian tauhid, tasawuf dan fiqh.

Bak malam Sabtu baroe tanggai 3 Agustus, Abu neu seumeubeut Kitab Sabilal Muhtadin lit-Tafaqquh fi Amrid-din, keunarang Syekh Muhammad Arsyad al-Banjari (Edited). Meuseubab keurana karap uroe Raya Haji, Abu khusus neucok bhah Kurbeun. Ken bhah Haji. Seubab meunyoe bhah Haji, keu ureung ka jak (jinoe ka masa ureung ek haji beurangkat). Maka Abu neu cok bhah kurbeun keu ureung nyang tinggai di nanggroe.

Lam majeulih beut, Abu neupeuingat bahwasajih, ibadah kurbeun nyoe raya that pahala, dan pun brat that peudeh binasa meunyoe ta tinggai. Abu neu kutip saboh hadih Nabi, nyang bahwa soe nyang hana kurbeun nibak uroe Raya Haji, bagi nyang na keumudahan, akan matee lam Yahudi atawa Nasrani. Nan dum brat bahaya meunyoe ta peu eleh ibadah kurbeun. Dan ibadah kurbeun nyoe ken siumu udeo si gö. Tapi tiep thon.

Baca juga:  Rezeki Dijamin oleh Allah, Jangan Halalkan Segala Cara

Abu juga neupeugah nyang bahwa lam kurbeun sep that ka neu ato le para ulama nyang awai-awai kiban cara seumeusi dan kiban watee nyang get ta seumeusi sampe abeh bhah kurbeun ka jeulaih.

Teuma, lam masa ureung teumanyong lam beut. Na saboh jawaban dari Abu nyang cukop meukeunong, perihal bhah jak beut. Seubab na sidroe jama’ah nyang tanyoeng, “Pu keuh deungon kamoe beut sibuleun si ge bak Abu, cuma meuduk meu deungo surah, hana meujak troh u Dayah, Abu ka neu kira kamoe keu murid..?” Abu neu jaweub, “Meunyoe ureung droeneuh neu kira lon keu guree, maka ureung droeneuh ka otomatis jeu keu murid bagi ulon”.

Leubeh nibak nyan, Abu geu sampaikan saboh hai. Yaitu, Abu neujak keunoe u Banda jak seumeubeut jama’ah. Peurseh lagee ureung meukat meuh intan permata bak gaki limong. Meukat di miyup payong. Padahai toko leupah that raya sideh di Samalanga. Meu ribe ureung troh jak beut. Meuseubab Abu sayang keu jama’ah nyang na di Banda, maka Abu neu sedia watee, neujak peurnoe umat, keu khadam ilme dan dakwah ubee nyang Abu mampu.

Baca juga:  Keberkahan Membawa Ketenangan Hidup

Bahkan ken cuma di Aceh. Seuningoh jih nibak uroe Sabtu, Abu teurbang u Batam, neujak “meukat” keu ureung Aceh di Batam. Neu jak peuturi dan peutrang ilme agama.

Apa Raban, Polem Deurih dan Apa Dolah sama-sama rh’am bulee bak meudeungö haba kiasan Abu nyang lagee nyan. Meuseubab, dum nan ka Abu neutem jak “meukat” di miyup payong. Kamoe manteng beuö meujak, hana meuboh yum keu Abu. Meuna meutan, jan nyang mangat asoe dan teumon bu sagai meujak.

FB IMG 1533561560803 1 - Abu Mudi: Lon Keubah Toko, Keunoe Lon Jak Meukat Bak Gaki Limong

Seumoga Abu, Allah brie panyang umu, sihat badan dan beurkah udep donya akhirat. Aminn..

(Nasaja Berita)

loading...

Comments